معاشی ترقی کیتے اقتصادی اصلاحات ویلھے دی لوڑھ، اڑان پاکستان تے عمل کر تے ملک ترقی دیاں نویاں اچایاں تے پڄسی، وزیراعظم دا پاکستان گورننس فورم 2026 دے افتتاحی سیشن نال خطاب

اسلام آباد۔ 25 فروری(اے پی پی) وزیراعظم محمد شہباز شریف معاشی ترقی کیتے اقتصادی اصلاحات کوں ویلھے دی لوڑھ قرار ݙیندے آکھیے جو چیلنجاں نال نمٹݨ کیتے مجموعی حکمتِ عملی اپناوݨ ضروری اے، برآمدات اچ اضافے دی ودھ گنجائش اے، بجٹ اچ براہِ راست ٹیکساں اچ کمی کرݨی ہوسی، 200 ارب روپے دی بجلی چوری کوں روکݨا ہوسی، مہنگائی دی شرح 38 فیصد توں گھٹ تھی تے سنگل ڈیجٹ تے آ گئی اے، پالیسی ریٹ 22 فیصد توں گھٹ تھی تے ساݙھے 10 فیصد تے اے، آئی ٹی برآمدات اچ 34 فیصد اضافہ تھئے، ݙو سالاں اچ بجلی دی قیمت ساݙھے اٹھ روپے فی یونٹ گھٹ تھئی اے، پی ڈبلیو ڈی تے یوٹیلٹی سٹور جیہے اداریاں دے خاتمے نال خزانے تے بوجھ گھٹ تھئے، صوبے، وفاق اتے عسکری قیادت مل تے ملکی ترقی کیتے کم کرن تاں ملک دی قسمت تکھے بدل ویسی۔ انہاں اے ڳالھ اسلام آباد اچ پاکستان گورننس فورم 2026 دے افتتاحی سیشن نال خطاب اچ آکھی۔ تقریب اچ وفاقی وزراء، پارلیمنٹ دے ارکان، پاکستان اچ برطانیہ دی ہائی کمشنر اتے ٻئاں اہم شخصیات شرکت کیتی۔ وزیراعظم پاکستان گورننس فورم دی کامیابی تے وفاقی وزیر منصوبہ بندی و ترقی احسن اقبال کوں مبارکباد ݙتی۔ انہاں آکھیا جو اڑان پاکستان نال پاکستان کامیابی دے جھنڈے لیسی، ݙو سالاں اچ میکرو اقتصادی صورتحال ٹیم ورک دے نتیجے اچ مستحکم تھئی اے، ایندے اچ وفاقی حکومت، صوبائی حکومتاں اتے سیاسی و عسکری قیادت دا اہم کردار اے، مشترکہ کوششاں نال ملک کوں معاشی بہتری دے رستے تے سٹ ݙتے، مجموعی اقتصادی صورتحال ماضی دے مقابلے اچ حوصلہ افزاء اے، معاشی اشاریے مسلسل بہتر تھیندے پئن، ساݙی ودھ کوشش ہوسی جو برآمدات ودھن، مزید محنت کر تے ملک کوں ترقی دے رستے تے پاوݨے۔ انھاں آکھیا جو آئی ایم ایف دے پروگرام دیاں شرطاں ہن ٻھل کجھ اصلاحات ساڈیاں اپݨیاں ہین جیندا آئی ایم ایف نال کوئی تعلق کائنی، اقتصادی اصلاحات کرݨ ضروری ہین، بجلی دے شعبے وچ مختلف ٹیکس شامل ہن جیندے اچ کراس سبسڈی وی ہئی، ایکوں مکائے اتے ݙو سالاں اچ بجلی دی قیمت ساݙھے اٹھ نو روپے فی یونٹ گھٹ تھئی اے، سولر دے حوالے نال جائز موقف سݨا ڳئے، سولر پلانٹس کوں تحفظ ݙتے، 200 ارب روپے دی بجلی چوری تھیندی اے ایندے تے توجہ ݙیوݨی ہوسی، کاروبار اچ سوکھ کیتے اقدامات کرݨن، لوکاں کوں سوکھ فیوݨ دی پوری کوشش اے۔ وزیراعظم آکھیے جو ملک اچ کاروباری پہیہ چلاوݨ کیتے اہم اقدامات کیتے گئن، اساں ہر چیلنج قبول کیتے، وفاقی حکومت تے چاروں صوبیاں دی حکومتاں مل تے ڈینہہ رات محنت نال چلدے رہسن تاں پاکستان بہوں جلد اپݨے پیرین تے کھڑا تھی ویسی۔ اللہ تعالیٰ پاکستان کوں معدنیات اتے ٻئے قدرتی وسائل نال مالا مال کیتے، ملک اچ کہیں چیز دی کمی کائنی ڄیکر اساں عزم کر گھنوں تاں پاکستان کجھ سالاں اچ بہوں سارے ملکاں کوں پچھو چھوڑ ݙیسی، سندھ، پنجاب، خیبر پختونخوا اتے بلوچستان اچ ٻہوں استعداد اے، لائیو سٹاک اتے ڈیری فارمنگ دی عالمی تجارت اچ ساڈا حصہ ٻہوں گھٹ اے جیکوں ودھاوݨا ہوسی۔ وزیراعظم آکھیے جو انھاں مختلف ملکاں دے دورے کیتن، دوست اتے برادر ملکاں دا سنیہا ملیے جو ساݙے قرضے رول اوور تھیندے پئن، اے وݙی کامیابی اے ٻھل ساݙی اصل کامیابی دوست ملکاں توں قرضیاں دی ری شیڈولنگ دی بجائے کاروباری معاہدیاں اچ اے جو ملک اچ سرمایہ کاری آوے۔