آپریشن غضب للحق، بلوچستان تے خیبر پختونخوا اچ افغان طالبان دے زمینی حملے ناکام بݨا ݙتے ڳئے

اسلام آباد۔ 3 مارچ (اے پی پی) افغان طالبان ولوں شمالی بلوچستان اچ 16 جہیں تے زمینی حملے تے 25 جہیں تے فائر ریڈ جݙاں جو خیبر پختونخوا اچ ہک ڄاہ تے زمینی حملے تے 12 فائر ریڈ کیتے ڳئے جنھاں کوں ناکام بݨا ݙتا ڳئے۔ وفاقی وزیر اطلاعات تے نشریات عطا اللہ تارڑ منگل کوں سماجی رابطے دے پلیٹ فارم "ایکس" تے آپݨی ہک پوسٹ اچ آپریشن غضب للحق دے حوالے نال 3 مارچ سویلے 10 وڄے تئیں دی خصوصی اپڈیٹ شیئر کیتی جیندے مطابق افغان طالبان شمالی بلوچستان اچ قلعہ سیف اللہ، نوشکی تے چمن ضلعیاں اچ 16 جہیں تے زمینی حملے کیتے جݙاں جو 25 ڄہیں تے پاک افواج دے خلاف فائر ریڈ دی کارروائیاں کیتی۔ ساری ڄہیں تے حملیاں کوں موثر طور تے پسپا کر ݙتا ڳیا جیندے نتیجے اچ افغان طالبان دے 27 کارندے ہلاک تے کئی زخمی تھئے۔ مادرِ وطن دا دفاع کریندیں ہوئیں ایف سی بلوچستان نارتھ دا ہک جوان شہید جݙاں جو پنج جوان زخمی تھئے۔ ایں طرح خیبر پختونخوا اچ ہک ڄاہ تے زمینی حملے دی کوشش کیتی ڳئی جݙاں جو 12 ڄہیں تے فائر ریڈ کیتا ڳیا جنھاں کوں بغیر کہیں جانی نقصان دے ناکام بݨا ݙتا ڳیا۔ خیبر پختونخوا اچ رات بھر جاری کارروائیاں دے دوران افغان طالبان دے 40 کارندے ہلاک تھئے۔ فالو اپ آپریشنز حالی تئیں جاری ہن۔