پاکستان دی ڈیجیٹل سرحداں دی حفاظت ساݙی اولین ذمہ واری اے، شزہ فاطمہ خواجہ

اسلام آباد۔ 5 مارچ (اے پی پی) وفاقی وزیر انفارمیشن ٹیکنالوجی شزہ فاطمہ خواجہ آکھیے جو پاکستان دی ڈیجیٹل سرحداں دی حفاظت ساݙی اولین ذمہ واری اے، قومی سلامتی تے کوئی سمجھوتہ کائناں کریسوں، قومی ڈیجیٹل کمیشن تشکیل ݙتا ڳئے جیندے سربراہ وزیراعظم جݙاں جو چارے صوبیں دے وزراء اعلیٰ تے ریگولیٹری باڈیز دے نمائندے ایندے ممبر ہن، ٹی وی چینلز کوں ڈیجیٹل کرݨ دی لوڑھ اے تاں جو ڈیجیٹل ہیکنگ توں بچا ونڄ سڳے۔قومی اسمبلی اچ سوالاں دے وقفے اچ مختلف سوالاں دے جواب اچ انھاں ایوان کوں ݙسایا جو حکومت نیشنل ٹیکنالوجی فنڈز دے ذریعے پاکستان سٹارٹ اپ فنڈ کوں عملی جامہ پویندی پئی اے، بین الاقوامی وی سیز پاکستانی تارکینِ وطن صنعت دے ماہرین تے مشتمل 15 رکنی مشاورتی کمیٹی تشکیل ݙتی ڳئی، پی ایس ایف دے تحت گرانٹ دے اجراء دا آغاز 2026 دے ݙوجھی سہ ماہی اچ متوقع اے۔ انھاں آکھیا جو ڈیجیٹل سرحداں دی حفاظت ساݙی اولین ترجیح اے، جتنے وسائل ایں مقصد کیتے چاہیدے ہوسن اوݙیسوں۔ بھارت دی طرفوں مئی اچ جارحیت ویلھے حکمتِ عملی نال پاکستان دی کہیں ویب سائٹ یا ڈیجیٹل ہیکنگ کائنی تھیوݨ ݙتی ڳئی۔شزہ فاطمہ ݙسایا جو سائبر ڈیفنس کیتے سسٹم لڳے ہوئن، پاکستان دی ڈیجیٹل بائونڈری کوں سکیور کرݨا اے، سائبر سکیورٹی ساݙی قومی سلامتی دا معاملہ اے، قومی سلامتی دے معاملے تے کوئی سمجھوتہ کائناں کیتا ویسی۔ شزہ فاطمہ خواجہ ݙسایا جو ڈیجیٹل چینلز کائنی بلکہ سیٹلائیٹ چینل تے ہیکنگ دا معاملہ سامݨے آئے، اے سپارکو دے ماتحت آندن، معاملہ سامݨے آندے ہی نوٹس ڳھدا ڳئے، ݙو وݙے چینلز اینالاگ ٹیکنالوجی تے چلدے پئن انھاں کوں وی ڈیجیٹل کرݨ دی لوڑھ اے۔