گزریل ݙو سالاں اچ پاکستان دی معیشت دیوالیہ پن دے خطرے توں نکل تے عالمی سطح تے ہک مثالی کیس سٹڈی دی حیثیت اختیار کر ڳھدی اے، وفاقی وزیر احسن اقبال

اسلام آباد۔ 5 مارچ (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال آکھیا جو گزریل ݙو سالاں اچ پاکستان دی معیشت دیوالیہ پن دے خطرے توں نکل تے عالمی سطح تے ہک مثالی کیس سٹڈی دی حیثیت اختیار کر ڳھدی اے اتے ہݨ حکومت 2035 تئیں معیشت کوں ہک ٹریلین ڈالر تئیں ڳھن ونجݨ دے ہدف تے کم کریندی پئی اے۔ اے پی پی نال ڳالھ مہاڑ کریندیں ہوئیں انھاں آکھیا جو ݙو سال پہلے پاکستان کوں شدید معاشی بحران دا سامݨا ہئی، تاہم موثر حکمرانی تے اصلاحات پاروں اج وݙے عالمی مالیاتی ادارے پاکستان دی معاشی بحالی کوں بطور مثال پیش کریندے پئن۔ انھاں آکھیا جو پاکستان گورننس فورم دا مقصد وفاقی تے صوبائی حکومتاں، وزارتاں، محکمیاں تے نجی شعبے کوں ”اُڑان پاکستان“ ایجنڈے دے تحت قابلِ عمل اصلاحات تے یکجا کرݨ اے تانجو 2035 تئیں ہک ٹریلین ڈالر دی معیشت دا ہدف حاصل کیتا ونج سڳے۔ احسن اقبال آکھیا جو حکومت 5Es فریم ورک (ایکویٹی، ایکسپورٹس، انرجی، انوائرنمنٹ تے ای پاکستان) تے عمل پیرا اے۔ ایں حکمتِ عملی دے تحت برآمدات کوں 100 ارب ڈالر توں ودھ تئیں گھن ونجݨ، پاکستان کوں ٹیکنالوجی تے مبنی معیشت اچ تبدیل کرݨ، مصنوعی ذہانت (AI) کوں اپناوݨ تے ماحولیاتی، توانائی تے سماجی چیلنجز نال نبڑݨ تے توجہ ݙتی ویندی پئی اے۔ انھاں زور ݙتا جو صرف انفراسٹرکچر ترقی کیتے کافی کائنی۔ بہترین ہارڈویئر وی سافٹ ویئر دے بغیر بے معنی اے۔ انھاں انسانی سرمائے دی اہمیت اجاگر کریندیں ہوئیں آکھیا جو عمارتاں تے سڑکاں اوں ویلھے تئیں فیدہ مند کائنی جݙاں تئیں اساں آپݨے لوکاں دی تعلیم، صحت تے مہارت اچ سرمایہ کاری نئی کریندے۔ وفاقی وزیر خبردار کیتا جو پاکستان دے سامݨے ݙو رستے ہن۔ اگر روایتی انداز اپنایا ڳیا تاں 2035 تئیں معیشت دا حجم زیادہ توں زیادہ 600 ارب ڈالر تئیں پڄ سڳدے، لیکن اگر جامع اصلاحات تے قومی ہم آہنگی کوں فروغ ݙتا ونجے تاں ہک ٹریلین ڈالر دا ہدف حاصل کیتا ونج سڳدے۔ انھاں دے مطابق انھاں ݙوہیں نتائج دے درمیان فرق ”گورننس دے معیار“ دا اے۔ انھاں اہم چیلنجز دا ذکر کریندیں ہوئے آکھیا جو ملک اچ آبادی اچ 2.55 فیصد اضافہ، 40 فیصد ٻالاں دا غذائی قلت (اسٹنٹنگ) دا شکار تھیوݨ، تقریباً 2 کروڑ 50 لکھ ٻالاں دا سکولاں توں ٻاہر تھیوݨ تے ٹیکس ٹو جی ڈی پی شرح دا صرف 10 فیصد تھیوݨ سنگین مسائل ہن۔ انھاں نے آکھیا جو جݙاں تئیں تعلیم، صحت، آبادی دی منصوبہ بندی تے غذائی قلت سویں مسائل حل نئی کیتے ویندے، پاکستان عالمی مسابقت اچ اڳوں نئی ودھ سڳدا۔ احسن اقبال آکھیا جو فورم دے ذریعے نجی شعبے کوں پالیسی سازاں دے نال براہِ راست مسائل چاوݨ دا موقع ملیا، جیندے نال شواہد دی بنیاد تے اصلاحات کوں تیز کرݨ اچ مدد ملسی۔ انھاں نے آکھیا جو سیاسی اختلافات دے باوجود سارے صوبیاں دی شرکت خوش آئند اے اتے ”ٹیم پاکستان“ دے طور تے معاشی ترقی کیتے مشترکہ جدوجہد ضروری اے۔ انھاں دا آکھݨ ہئی جو 2035 تئیں ہک ٹریلین ڈالر تے 2047 تئیں ترائے ٹریلین ڈالر معیشت دا ہدف قومی یکجہتی تے اصلاحات نال ای حاصل کیتا ونج سڳدے۔