پاکستان ادارہ جاتی رابطیں کوں مستحکم کرݨ کیتے کمبوڈیا کوں اسلام آباد اچ آپݨا سفارتخانہ کھولݨ دی پیشکش کیتی اے، وزارتِ خارجہ

اسلام آباد۔ 5 مارچ (اے پی پی) پاکستان-کمبوڈیا پارلیمانی فرینڈ شپ گروپ دا پہلا بریفنگ اجلاس پارلیمنٹ ہاؤس اچ منعقد تھیا۔ اجلاس دی صدارت گروپ دی کنوینئر رکنِ قومی اسمبلی شمائلہ رانا کیتی۔ اجلاس اچ دانیال احمد، احمد عتیق انور، ثمر ہارون بلور، تمکین اختر نیازی، ماہ جبیں خان عباسی، شازیہ فرید، نتاشہ دولتانہ، نیلم کماری تے سعیدہ جمشید شرکت کیتی۔ وزارتِ خارجہ تے وزارتِ تجارت دے حکام وی اجلاس اچ شریک تھئے جݙاں جو کمبوڈیا اچ پاکستان دے سفیر ویڈیو لنک دے ذریعے بریفنگ ݙتی۔کنوینئر شمائلہ رانا ݙوہائیں ملکاں وچال پارلیمانی رابطیں کوں مضبوط بݨاوݨ دی لوڑھ تے زور ݙیندے آکھیا جو پارلیمانی فرینڈ شپ گروپس ݙوہیں ملکاں دی مقننہ وچال مکالمے تے عوامی سطح تے رابطیں کوں گہرا کرݨ کیتے ہک اہم پلیٹ فارم ہن، اساکوں امید اے جو اے گروپ تعاون دے نویں رستے ڳولݨ اچ مددگار ثابت تھیسی۔ وزارتِ خارجہ دے حکام شرکاء کوں ݙسایا جو پاکستان کمبوڈیا کوں اسلام آباد اچ آپݨا سفارتی مشن (سفارتخانہ) کھولݨ دی پیشکش کیتی اے تاں جو ادارہ جاتی رابطیاں کوں مزید مستحکم کیتا ونڄ سڳے۔ پاکستان انھاں ابتدائی ملکاں اچ شامل اے جنھاں کمبوڈیا کوں تسلیم کیتا تے اوں توں ݙوہائیں ملکاں وچال دوستانہ تعلقات قائم ہن، اڄوکے سالاں اچ تجارت، معیشت تے پارلیمانی سطح تے تعاون اچ بتدریج ودھارا تھئے ۔ سیکنڈ جوائنٹ ٹریڈ کمیشن دے اجلاس تعاون دے نویں شعبیں دی نشاندہی اچ اہم کردار ادا کیتے۔اجلاس اچ ݙسایا گیا جو پاکستان تے کمبوڈیا وچال ٹیکسٹائل تے چمڑے دی مصنوعات، دوائیں، انفارمیشن ٹیکنالوجی، سیاحت تے ثقافت سودھے ٻئے شعبیں اچ تجارت ودھاوݨ دے وسیع موقع موجود ہن۔ ارکان پارلیمنٹ ایں ڳالھ تے زور ݙتا جو عوامی سطح تے رابطیں کوں ودھارا ݙیوݨ کیتے تعلیم، سیاحت تے ثقافتی تبادلیں تے توجہ ݙتی ونڄے۔ اجلاس مُکݨ تے ایں عزم دا اعادہ کیتا ڳیا جو پارلیمانی سفارتکاری دے ذریعے ݙوہیں ملکاں دے برادرانہ تعلقات کوں ٻٰا ودھایا ویسی۔