ایرانی سپریم لیڈر آیت اللہ خامنہ ای شہید تھی ڳئے، ایرانی سرکاری میڈیا دی تصدیق

تہران۔ 1 مارچ (اے پی پی) ایرانی سرکاری میڈیا ایران دے سپریم لیڈر آیت اللہ خامنہ ای دے شہید تھیوݨ دی تصدیق کر ݙتی اے۔ ایرانی سرکاری میڈیا دے مطابق آیت اللہ خامنہ ای ہفتے کوں تھیوݨ آلے امریکی تے اسرائیلی حملیاں اچ شہید تھئے، سپریم لیڈر دی شہادت انھاں دے دفتر اچ تھئی۔ ٹی وی تے ایران دی سپریم نیشنل سکیورٹی کونسل دا بیان پڑھ تے سݨایا ڳیا جیندے اچ خامنہ ای دی موت دی باضابطہ تصدیق کیتی ڳئی۔ ایرانی سرکاری میڈیا دے مطابق سپریم لیڈر دی شہادت تے ایران اچ 7 روزہ چھٹی تے 40 ݙینھ دا سوگ دا اعلان کیتا ڳئے۔ ایرانی سرکاری میڈیا اسرائیلی تے امریکی حملیاں اچ سپریم لیڈر خامنہ ای دی دھی تے ݙوہترے دی شہادت دی وی تصدیق کر ݙتی۔ ایرانی سرکاری میڈیا ݙسایا جو حملیاں اچ آیت اللہ خامنہ ای دے جوائی تے نونہہ وی شہید تھی ڳئے۔