ایران توں پاکستانیاں دے انخلاء کیتے آذربائیجان دی مدد دے مشکور ہیسے، خلیجی ملکاں اچ پاکستانی سفارتخانے پاکستانی شہریاں کوں سہولت فراہم کرݨ کیتے ہر دم متحرک رہن، وزیراعظم شہباز شریف

اسلام آباد۔ 5 مارچ (اے پی پی) وزیر اعظم محمد شہباز شریف آکھیا جو ایران توں پاکستانیاں دے انخلاء کیتے برادر ملک آذربائیجان دی مدد دے مشکور ہیسے، خلیجی ملکاں اچ پاکستانی سفارتخانے پاکستانی شہریاں کوں سہولت فراہم کرݨ کیتے ہر دم متحرک رہن۔ خمیس کوں وزیراعظم آفس دے میڈیا ونگ توں جاری بیان دے مطابق اے ڳالھیں انہاں ایران توں پاکستانیاں دے انخلاء تے خلیجی ملکاں اچ مقیم پاکستانیاں دے حوالے نال اجلاس دی صدارت کریندیں ہوئے کیتا۔ اجلاس اچ نائب وزیر اعظم تے وزیر خارجہ سینیٹر اسحاق ڈار، وفاقی وزراء اعظم نذیر تارڑ، عطاء اللہ تارڑ، مشیر وزیر اعظم رانا ثناء اللہ، وزیر مملکت طلال چوہدری، معاون خصوصی سید طارق فاطمی تے متعلقہ اعلیٰ حکام شرکت کیتی۔ اجلاس کوں ایران توں پاکستانیاں دے انخلاء دی موجودہ صورتحال تے بریفنگ ݙتی ڳئی۔ اجلاس اچ ݙسایا گیا جو اللہ دے فضل و کرم نال ایران توں پاکستانی بحفاظت وطن واپس پڄدے پئن، آذربائیجان اچ پاکستانی سفارتخانہ پوری طرح متحرک اے، وزیر اعظم دی ہدایت تے دفتر خارجہ ایں ساری صورتحال دی مسلسل نگرانی کریندا پئے۔ اجلاس کوں خلیجی ملکاں اچ مقیم پاکستانیاں دی سہولت کیتے پاکستانی سفارتخانیاں دے اقدامات تے وی بریفنگ ݙتی ڳئی۔ وزیر اعظم ہدایت کیتی جو خلیجی ملکاں اچ پاکستانی سفارتخانے پاکستانی شہریاں کوں سہولت فراہم کرݨ کیتے ہر دم متحرک رہن۔