این ایچ اے دے ٹول پلازیاں دی اوپن تے شفاف انداز نال نیلامی احسن اقدام اے، جاری منصوبیاں کوں معینہ مدت اچ مکمل تے کم دے بہترین معیار کوں یقینی بݨایا ونڄے، وزیراعظم شہباز شریف دا این ایچ اے دی کارکردگی بارے جائزہ اجلاس توں خطاب

اسلام آباد۔ 5 مارچ (اے پی پی) وزیراعظم محمد شہباز شریف آکھیا جو این ایچ اے دے ٹول پلازیاں دی اوپن تے شفاف انداز نال نیلامی ہک احسن اقدام اے، جاری منصوبیاں کوں معینہ مدت اچ مکمل کیتا ونجے اتے موٹرویز دی مرمت دے دوران کم دے بہترین معیار کوں یقینی بݨایا ونجے۔ خمیس کوں وزیراعظم آفس دے میڈیا ونگ توں جاری بیان دے مطابق اے ڳالھیں انہاں نیشنل ہائی وے اتھارٹی دی کارکردگی بارے جائزہ اجلاس دی صدارت کریندیں ہوئیں کیتا۔ اجلاس اچ وفاقی وزیر منصوبہ بندی احسن اقبال، وفاقی وزیر مواصلات عبدالعلیم خان، وفاقی وزیر برائے اقتصادی امور احد خان چیمہ تے اعلیٰ سرکاری حکام شرکت کیتی۔ وزیرِ اعظم این ایچ اے دی آمدنی اچ اضافے، موٹرویز تے ہائی ویز تے حفاظتی اقدامات تے مؤثر طور توں عملدرآمد، سروس ایریاز دی بہتری تے ٻئے اقدامات تے وفاقی وزیرِ مواصلات عبدالعلیم خان تے انھاں دی ٹیم دی تعریف کیتی۔ انھاں آکھیا جو این ایچ اے دے ٹول پلازیاں دی اوپن تے شفاف انداز نال نیلامی ہک احسن اقدام اے، موٹرویز دی مرمت دے دوران کم دے بہترین معیار کوں یقینی بݨایا ونجے۔ اجلاس کوں این ایچ اے دی کارکردگی تے تفصیلی بریفنگ ݙتی ڳئی۔ اجلاس کوں ݙسایا ڳیا جو 2024 دی نسبت مالی سال 2025 اچ این ایچ اے دی آمدن 66.8 ارب روپے توں ودھ تے 109 ارب روپے تئیں پڄ ڳئی، آمدن اچ 63 فیصد اضافہ وزیرِ اعظم دی ہدایت تے این ایچ اے دے ٹول ٹیکس وصولی تے ٻئے اقدامات نال ممکن تھیا۔ اجلاس کوں ٻیا ݙسایا ڳیا جو 2024 دی نسبت 2025 اچ موٹرویز تے ایم ٹیگ دی تعداد 20 توں ودھ تے 81 فیصد تھی ڳئی، ہائی ویز تے موٹرویز تے ایکسل لوڈ دی پابندی دی شرح وی بالترتیب 90 تے 95 فیصد تئیں پڄ ڳئی جیندے نال نہ صرف حادثات اچ ڳھٹکی تھئی اے بلکہ سڑکاں تے دباؤ اچ ڳھٹکی تے انھاں دی میعاد اچ ودھارا تھیے۔ اجلاس کوں ݙسایا ڳیا جو موٹرویز تے موجود سروس ایریاز کوں بہتر بݨاوݨ دے نال نال قومی شاہراہواں تے وی سروس ایریاز بݨائے ویندے پئن۔ اجلاس کوں ݙسایا گیا جو ایں سال موٹرویز تے ایئر ایمبولینس سروس متعارف کیتی ویسی۔ ایندے علاوہ موٹروے دے سارے انٹرچینجز تے 1122 دی سروس ہر وقت تیار رہندی اے۔ اجلاس کوں ݙسایا گیا جو این ایچ اے دے آپݨے بجٹ توں لیاری ایکسپریس وے، ٹھوکر نیاز بیگ (این 5) تے اسلام آباد مری ایکسپریس وے دی اپ گریڈیشن مکمل تھی ڳئی اے۔ وزیرِ اعظم وزیرِ مواصلات تے انھاں دی ٹیم دی کوششاں دی تعریف کیتی اتے جاری منصوبیاں کوں معینہ مدت اچ مکمل کرݨ دی ہدایت کیتی۔