سعودی دارالحکومت ریاض اچ زور دار دھماکیاں دے بعد امریکی سفارت خانے دی عمارت اچ بھاہ لڳ گئی، صدر ٹرمپ دا جلد جواب ݙیوݨ دا اعلان

ریاض۔ 3 مارچ (اے پی پی) سعودی عرب دے دارالحکومت ریاض اچ منگل دی سویل زور دار دھماکیاں دی آوازاں سݨی ڳئی جیندے بعد امریکی سفارت خانے دی عمارت اچ بھاہ لڳ گئی اتے ریاض دے سفارتی کوارٹر، غیر ملکی سفارت خانے تے غیر ملکی سفارت کاراں دی رہائش اچ کالے دھوئیں دے بادل ݙیکھݨ اچ آئے۔ بی بی سی دے مطابق سعودی فوج دے ترجمان ݙسایا جو ریاض اچ امریکی سفارت خانے کوں ݙو ڈرون حملیاں اچ نشانہ بݨایا ڳئے۔ امریکی سفارت خانے ایکس (X) تے جاری بیان اچ آکھیا جو ایں واقعے دے نتیجے اچ عمارت اچ محدود پیمانے تے بھاہ لڳی اتے معمولی نقصان تھیے۔ ایندے بعد امریکی مشن برائے سعودی عرب جدہ، ریاض تے ظہران کیتے شیلٹر اِن پلیس نوٹیفکیشن جاری کیتے اتے آکھیا جو او خطے اچ کہیں وی فوجی تنصیبات کیتے غیر ضروری سفر کوں محدود کریسے۔ امریکی صدر ڈونلڈ ٹرمپ آکھیا جو ریاض اچ امریکی سفارت خانے تے حملے دا جلد جواب ݙتا ویسے۔ تاس دے مطابق دھماکیاں دے نتیجے اچ کہیں دے ہلاک یا زخمی تھیوݨ دی فوری طور تے کوئی اطلاع کائنی ملی، سعودی عرب دی وزارتِ دفاع تصدیق کیتی اے جو ریاض اچ امریکی سفارت خانے تے ݙو ایرانی ڈرون (یو اے وی) حملہ کیتا۔ وزارت دے مطابق سفارتی مشن دی عمارت کوں معمولی نقصان تھیا اتے بھاہ تھوڑے جیہے حصے اچ لڳی۔ فاکس نیوز دی صحافی جینیفر گرفن آپݨے ایکس اکاؤنٹ تے ݙسایا جو ایرانی ڈرون حملے دے ویلھے ریاض اچ امریکی سفارت خانہ خالی ہئی، ایں واقعے اچ کوئی شخص ہلاک یا زخمی کائنی تھیا۔