سینیٹ اچ ارکان دی ایران تے اڄوکے حملے دی سخت الفاظ اچ مذمت، اونکوں غیر محفوظ تے ناقابلِ جواز کارروائی قرار ݙے ݙتا

اسلام آباد۔ 3 مارچ (اے پی پی)سینیٹ اچ اراکینِ سینیٹ ایران تے اڄوکےحملے دی سخت الفاظ اچ مذمت کیتی تے اونکوں غیر محفوظ تے ناقابلِ جواز کارروائی قرار ݙتا جیندے نتیجے اچ شہریاں کوں بارا ضیان پُڄے۔ بحث اچ حصہ گھندے پاکستان تحریک انصاف دے پارلیمانی رہنما سید علی ظفر اسرائیل تے امریکہ دے اقدامات دی شدید مذمت کیتی تے انھاں کوں بین الاقوامی قوانین تے انسانی حقوق دی خلاف ورزی قرار ݙتا۔ انھاں ایران دی قیادت کوں نشانہ بݨاوݨ تے نشوم شہریاں تے بلا تفریق بمباری دی نشاندہی کیتی تے آکھیا جو اے حملے خطے اچ کشیدگی ودھیندے پئن تے استحکام کیتے شدید خطرہ ہن۔ اے حملے انسانیت تے براہِ راست حملہ ہن، تے ساݙی قوم دی طرفوں اساں ایہوجیھے ظلم دے خلاف آواز بلند کریندوں۔پی ایم ایل-این دے سینیٹر ڈاکٹر افنان اللہ ایران تے بلا جواز حملے دی سخت مذمت کیتی تے اونکوں جاݨ ٻجھ تے غیر ضروری قرار ݙتا جیندے نتیجے اچ ایرانی سپریم لیڈر شہید تھی ڳئے۔ انھاں خبردار کیتا جو جھیڑا ودھدا ویندے تے ایندے رکݨ دے آثار کائنی، ایں کیتے احتیاط دی لوڑھ اے ۔ انھاں پاکستان دے ذمہ دارانہ موقف تے زور ݙتا جو پاکستانی زمین تے کوئی غیر ملکی اݙے کائنی تے نہ ہی کہیں حملے کیتے اتھوں کارروائی کیتی ڳئی، باوجود ایندے جو خطے اچ کشیدگی ودھدی پئی اے۔عوامی نیشنل پارٹی دے سینیٹر حاجی ہدایت اللہ حکومت توں اپیل کیتی جو شہریاں کوں پرامن احتجاج تے آپݨے جذبات دے قانونی اظہار دا حق برقرار رکھݨ کوں یقینی بݨایا ونڄے۔ سینیٹر جام سیف اللہ نوٹ کیتا جو متاثرین آپݨی 86 سال دی عمر اچ وی آپݨے مقصد کیتے ثابت قدمی دا مظاہرہ کیتا جیندے نال جھیڑے دی انسانی قیمت واضح تھیندی اے۔ جے یو آئی-ف دے سینیٹرعطا الرحمٰن خطے اچ ودھدی کشیدگی تے زور ݙتا تے آکھیا جو اڄوکے حالات امن کیتے سنگین خطرہ ہن۔ انھاں پاکستان دی تاریخی حیثیت تے خطے اچ استحکام کیتے محتاط خارجہ پالیسی دی لوڑھ تے زور ݙتا، خاص طور تے بھارت دے نال موجودہ چیلنجز تے افغانستان اچ خراب تھیندے حالات دے پیشِ نظر۔سینیٹر بلال اڄوکے تشدد اچ ودھارے تے تشویش ظاہر کیتی جیندے نال کئی جاناں ضائع تھیاں تے خبردار کیتا جو خطہ ہݨ وی غیر مستحکم اے تے چھوٹے جیھے واقعے توں وی وݙے جھیڑے دا خطرہ اے۔ عون عباس بپی حملیں تے ݙکھ ظاہر کیتا، آیت اللہ خامنہ ای تے 150 توں ودھ اسکول دی طالبات دی ہلاکت تے ݙکھ تے افسوس کیتا ۔ انھاں حملیں کوں غیر منصفانہ تے قابلِ مذمت قرار ݙتا، نشوم شہریاں کوں بلا مقصد نشانہ بݨاوݨ تے افسوس ظاہر کیتا تے متاثرہ خانداناں کیتے دعاواں کیتیاں۔ سینیٹرز دنیش کمار، اعظم خان سواتی تے مشال یوسفزئی وی ایران تے اسرائیلی حملے دی مذمت کیتی تے جھیڑے دے پرامن حل دی اپیل کیتی۔