قومی اسمبلی قومی احتساب ترمیمی ٻل 2026 دی منظوری ݙے ݙتی

اسلام آباد۔ 5 مارچ (اے پی پی) قومی اسمبلی نے قومی احتساب ترمیمی ٻل 2026 دی منظوری ݙے ݙتی۔ قومی اسمبلی دے اجلاس اچ مہہ جبین خان عباسی قومی احتساب ترمیمی ٻل 2025 سینیٹ توں منظور شدہ صورت اچ ایوان اچ پیش کرݨ دی اجازت منڳی، اجازت ملݨ تے انھاں ٻل ایوان اچ پیش کرݙتا۔وفاقی وزیرِ قانون اعظم نذیر تارڑ ٻل دی مخالفت کائنی کیتی تے ݙسایا جو ٻل اچ چار ترامیم دی تجویزاں ݙتیاں ڳئن، ہک تجویز ہائیکورٹ کنے ضمانت دے اختیار متعلق، ٻئی کارکردگی دی بنیاد تے چیئرمین نیب دی مدت اچ توسیع تے ہک تجویز نیب توں سزا یافتہ شخص کوں ہائیکورٹ دے علاوہ وفاقی آئینیعدالت اچ اپیل دا حق ݙیوݨ توں متعلق اے۔ انھاں آکھیا جو او انھاں ترامیم دی مخالفت کائناں کریسن۔خواجہ اظہار الحسن آکھیا جواوٻل دی مخالفت کائنی کرݨ چاہندے تاں جو ٻل دا مسودہ اساکوں پہلے ݙیوݨا چاہیدا ہئی۔ عالیہ کامران آکھیا جو لیڈر آف دی اپوزیشن تے قائدِ ایوان وچال مشاورت ختم کائنی کرݨی چاہیدی۔ اعظم نذیر تارڑ آکھیا جو 175 ایف ٻہوں واضح اے، اوندے اچ ہائیکورٹ دی سزاواں دے خلاف آئینی عدالت اچ اپیل دا حق ݙیوݨ دے حوالے نال واضح ہدایات ہن۔ انھاں آکھیا جو قانون سازی پارلیمان دا اختیار اے، معزز رکن کیڑھی مشاورت دی ڳالھ کریندی پئی اے، ایران تے جنگ جیھے حساس معاملے تے اپوزیشن لیڈر اجلاس اچ شریک کائنی تھئے۔ بعد اچ ایوان ٻل دی شق وار منظوری ݙے ݙتی۔