مؤثر نظامِ انصاف کیتے پیشہ ورانہ تحقیقات ناگزیر ہن، چیف جسٹس پاکستان

اسلام آباد۔ 5 مارچ (اے پی پی) چیف جسٹس آف پاکستان یحییٰ آفریدی آکھیے جو مؤثر نظامِ انصاف کیتے پیشہ ورانہ، غیر جانبدار تے قانون موجب تحقیقات بنیادی حیثیت رکھیندن، پولیس تے عدالتاں فوجداری نظامِ انصاف دے اہم ستون ہن جیڑھے آپݨی آپݨی ذمہ واریاں دے ذریعے انصاف دی فراہمی کوں یقینی بݨیندن۔سپریم کورٹ دے شعبہ تعلقاتِ عامہ دے جاری اعلامیہ موجب اے ڳالھ انھاں پولیس سروس آف پاکستان دے 52 ویں کامن ٹریننگ پروگرام دے 42 زیرِ تربیت افسران دے وفد نال ملاقات دے دوران آکھی جنھاں فیڈرل جوڈیشل اکیڈمی اچ جاری پروفیشنل ایکسچینج پروگرام دے تحت سپریم کورٹ آف پاکستان دا دورہ کیتا۔ وفد دی قیادت ڈائریکٹر جنرل فیڈرل جوڈیشل اکیڈمی تے ڈپٹی کمانڈنٹ نیشنل پولیس اکیڈمی مشترکہ طور تے کیتی۔چیف جسٹس آپݨے خطاب اچ پاکستان دے فوجداری نظامِ انصاف دی اہم خصوصیات تے روشنی پیندے آکھیا جو پولیس دی ذمہ واری غیر جانبدارانہ تے قانونی تقاضیں موجب تفتیش کرݨ اے جݙاں جو عدالتاں پیش کیتے ڳئے شواہد دی بنیاد تے مقدمات دا فیصلہ کریندن۔ انھاں دا آکھݨ ہئی جو مؤثر انصاف دی فراہمی دا انحصار بنیادی طور تے شفاف، معروضی تے پیشہ ورانہ تحقیقات تے تھیندے۔ انھاں آکھیا جو فیڈرل جوڈیشل اکیڈمی اچ حاصل تھیوݨ آلی تربیت تے عملی آگاہی نال زیرِ تربیت افسراں کوں عدالتاں دے طریقہ کار، شہادتاں دے تقاضیں تے منصفانہ ٹرائل دے اصولاں کوں بہتر طور تے سمجھݨ اچ مدد ملسی، جیندے نال انصاف دے نظام دے مختلف اداریں وچال ہم آہنگی مضبوط تھیسی۔چیف جسٹس افسراں کوں ہدایت کیتی جو او آپݨے پیشہ ورانہ کیریئر اچ دیانتداری، انصاف پسندی تے قانون دی حکمرانی کوں مقدم رکھن۔ انھاں آکھیا جو سرکاری اہلکار تھیوݨ دے ناطے انھاں کوں عوام کیتے قابلِ رسائی، بااخلاق تے جوابدہ تھیوݨا چاہیدے کیوں جو مؤثر طرزِ حکمرانی دی بنیاد قانون تے عوام دے احترام تے قائم تھیندی اے۔ دورے دے اختتام تے ادارہ جاتی خیر سگالی دے اظہار دے طور تے یادگاری شیلڈز دا تبادلہ وی کیتا ڳیا۔