ملک اچ پٹرولیم مصنوعات دے وافر ذخائر موجود ہن، ذخیرہ اندوزی دے خلاف سخت کارروائی دا فیصلہ، اوگرا

اسلام آباد۔ 5 مارچ (اے پی پی) اڄوکی جغرافیائی تے علاقائی صورتحال پاروں حکومتِ پاکستان عوام کوں یقین دہانی کروائی اے جو ملک اچ پٹرولیم مصنوعات دے وافر ذخائر موجود ہن جیہڑے قومی طلب کوں پورا کرݨ کیتے کافی ہن۔ ترجمان اوگرا ولوں جاری بیان دے مطابق اے واضح کیتا ویندے جو پٹرولیم مصنوعات دی غیر قانونی ذخیرہ اندوزی یا انھاں کوں غیر مجاز ڄہیں تے رکھݨ اچ ملوث کہیں وی فرد یا ادارے دے خلاف سخت قانونی کارروائی کیتی ویسی، بالخصوص او مقامات جیہڑے باقاعدہ لائسنس یافتہ آئل ڈپو یا آئل مارکیٹنگ کمپنیاں دے ریٹیل آؤٹ لیٹس دے علاوہ ہوون۔ انھاں آکھیا جو مشاہدے اچ آئے جو کڄھ عناصر ایہوجیہے حالات اچ ناجائز منافع خوری کیتے پٹرولیم مصنوعات دی ذخیرہ اندوزی دی کوشش کریندن۔ ایں رجحان دی روک تھام کیتے سارے صوبائی چیف سیکرٹریز کوں ہدایت کیتی ڳئی اے جو او آپݨے متعلقہ اضلاع اچ ڈپٹی کمشنرز کوں متحرک کرن تانجو او معائنہ کرن اتے جتھاں وی پٹرولیم مصنوعات دی غیر قانونی ذخیرہ اندوزی ہووے اتھاں متعلقہ مقامات کوں سیل کریندے ہوئیں قانون دے مطابق کارروائی کیتی ونجے۔ آئل اینڈ گیس ریگولیٹری اتھارٹی (اوگرا) دی ٹیماں وی فیلڈ اچ موجود ہن اتے آئل ڈپوز تے ریٹیل آؤٹ لیٹس تے پیٹرولیم مصنوعات دے ذخائر دی مسلسل نگرانی کریندی پئن تانجو فراہمی کوں یقینی بݨایا ونج سڳے اتے کہیں وی قسم دی بے ضابطگی یا بدعنوانی دی روک تھام کیتی ونج سڳے۔ عوام توں گزارش اے جو کہیں وی قسم دی افواہیں تے توجہ نہ ݙیون اتے نہ ای غیر ضروری طور تے پٹرولیم مصنوعات دی خریداری یا ذخیرہ اندوزی کرن۔