نادرآباد فلائی اوور منصوبہ تے کام تیزی نال جاری، تریجھا فلائی اوور ستمبر تئیں مکمل کر گھدا ویسے، کمشنر ملتان ڈویژن

ملتان۔ 03 مارچ (اے پی پی) کمشنر ملتان ڈویژن عامر کریم خان نادرآباد اچ زیرِ تعمیر فلائی اوور تے سڑک منصوبے دا تفصیلی دورہ کیتا اتے جاری ترقیاتی کماں دا جائزہ گھدا۔ ایں موقع تے متعلقہ محکمیاں دے افسراں منصوبے دی پیش رفت بارے بریفنگ ݙتی۔ کمشنر ہدایت جاری کریندیں ہوئیں آکھیا جو سڑک دے ݙوہیں پاسے ڈرین دی تعمیر دا کم جون 2026 دے چھیکڑ تئیں ہر صورت اچ مکمل کیتا ونجے تانجو بارشاں دے دوران پاݨی دی نکاسی دا موثر نظام یقینی بݨایا ونج سڳے۔ انھاں واضح کیتا جو منصوبے اچ کہیں قسم دی تاخیر برداشت کائنی کیتی ویسے تے مقررہ ٹائم لائن تے عملدرآمد یقینی بݨایا ونجے۔ انھاں متعلقہ حکام کوں ہدایت ݙتی جو ایٹ گریڈ روڈ دی کارپٹنگ اڳلے 10 توں 15 ݙینہاں اچ مکمل کیتی ونجے تانجو شہریاں کوں بہتر سفری سہولیات فراہم کیتی ونج سڳن۔ کمشنر ٻیا آکھیا جو وزیرِ اعلیٰ پنجاب دے وژن دے مطابق شہریاں کوں محفوظ، معیاری تے جدید سفری سہولیات دی فراہمی حکومت دی پہلی ترجیح اے۔ انھاں ترقیاتی منصوبیاں اچ رفتار تے شفافیت برقرار رکھݨ تے زور ݙیندیں ہوئیں آکھیا جو عوامی سہولت دے منصوبے مقررہ معیار دے مطابق مکمل کیتے ونجن تے کم دے معیار تے کوئی سمجھوتہ نہ کیتا ونجے۔ ایکسیئن ہائی ویز بریفنگ ݙیندیں ہوئیں ݙسایا جو منصوبے دی مجموعی لاگت 5 ارب 30 کروڑ روپے اے جݙاں جو ہݨ تئیں تقریباً 4 ارب روپے خرچ کیتے ڳئن۔