وزیراعظم شہباز شریف تے ملائیشین وزیراعظم داتو سری انور ابراہیم دا ٹیلیفونک رابطہ، مشرقِ وسطیٰ تے خلیج دی صورتحال تے فریقین کوں تحمل دا مظاہرہ کرݨ تے زور

اسلام آباد۔ 5 مارچ (اے پی پی) پاکستان تے ملائیشیا مشرقِ وسطیٰ تے خلیج دی صورتحال دے تناظر اچ فریقین تے زور ݙتے جو او تحمل دا مظاہرہ کرن، دشمنی ختم کرن تے آپݨے اختلافات کوں سفارت کاری تے ڳالھ مہاڑ دے ذریعے حل کرن۔وزیراعظم محمد شہباز شریف تے ملائیشیا دے وزیراعظم داتو سری انور ابراہیم وچال ٹیلیفون تے ڳالھ مہاڑ تھئی جیندے اچ وزیراعظم شہباز شریف ایران دے خلاف اسرائیل دے حملیں تے بھرا خلیجی ملکاں دے خلاف حملیں دے بعد مشرقِ وسطیٰ اچ جاری کشیدگی تے آپݨی شدید تشویش دا اظہار کیتا۔ انھاں اقوامِ متحدہ دے چارٹر تے بین الاقوامی قانون اچ درج ساری ریاستاں دی خودمختاری تے علاقائی سالمیت دے احترام کوں برقرار رکھݨ دی ضرورت تے زور ݙتا تے سارے فریقاں تے زور ݙتا جو او تحمل دا مظاہرہ کرن، دشمنی ختم کرن تے آپݨے اختلافات کوں سفارت کاری تے ڳالھ مہاڑ دے ذریعے حل کرن۔ وزیرِاعظم دفتر دے میڈیا ونگ توں جاری بیان موجب ݙوہائیں رہنماواں اتفاق کیتا جو امن دی بحالی تے معاملات کوں معمول تے گھن آوݨ ٻہوں ضروری اے، لیکن اے سارے فریقین دی طرفوں ودھ توں ودھ تحمل دے استعمال نال ہی حاصل کیتا ونڄ سڳدے۔ ایں سلسلے اچ انھاں رل تے کم کرݨ تے آپݨے موقف کوں مستقل بنیاداں تے مربوط کرݨ تے اتفاق کیتا۔ وزیرِاعظم شہباز شریف نے وزیرِاعظم انور ابراہیم کوں افغانستان دے تناظر اچ اڄوکی پیشرفت دا وی ݙسایا ۔ انھاں خاص طور تے خطے تے ایندے ٻاہر دہشت گردی مکاوݨ کیتے پاکستان کوں دہشت گرد عناصر دے خلاف محفوظ بݨاوݨ سانڳے کیتی ونڄݨ آلی کوششاں دا ݙسایا ۔ ݙوہیں رہنماواں سانجھی دلچسپی دے سارے امور تے نیڑے رابطے برقرار رکھݨ تے اتفاق کیتا۔