وزیراعظم شہباز شریف نال وفاقی وزیر داخلہ محسن نقوی دی ملاقات

لاہور۔ 1 مارچ (اے پی پی) وزیراعظم محمد شہباز شریف نال وفاقی وزیر داخلہ محسن نقوی اتوار کوں اتھاں ملاقات کیتی جیندے اچ انھاں وزیراعظم کوں روم تے اٹلی اچ تھیوݨ آلے چار ملکی وزرائے داخلہ اجلاس آچ آپݨی شرکت بارے بریفنگ ݙتی جیندے اچ پاکستان دے علاوہ اٹلی، اسپین تے یونان دے وزرائے داخلہ شریک ہن۔ وزیراعظم آفس دے میڈیا ونگ توں جاری بیان دے مطابق وزیر داخلہ وزیراعظم کوں پولینڈ اچ تھیوݨ آلے چھی فریقی وزرائے داخلہ اجلاس اچ آپݨی شرکت بارے وی بریف کیتا جیندے اچ پاکستان تے پولینڈ دے علاوہ لیٹویا، فن لینڈ، ایسٹونیا تے لیتھوانیا دے وزرائے داخلہ شریک ہن۔ وزیر داخلہ وزیراعظم کوں ݙسایا جو ݙوہیں کانفرنسز اچ شریک ملکاں پاکستانیاں کیتے قانونی ورک پرمٹ دے جلد از جلد اجرا تے اتفاق کیتے۔ انھاں ݙسایا جو رکن ملکاں یورپی ممالک آلے پاسے غیر قانونی سفر کرݨ آلیاں دی تعداد اچ صرف ہک سال اچ 47 فیصد ڳھٹکی کرݨ کیتے انسانی سمگلنگ دے خاتمے کیتے اقدامات تے پاکستان دی کارکردگی کوں سراہیا۔ انھاں وزیراعظم کوں ݙسیا جو پولینڈ تے اٹلی پاکستانی سفارتی تے سرکاری پاسپورٹ رکھݨ آلیاں کیتے جلدی ویزا دی شرط ختم کر ݙیسن۔ پاکستان دی امیگریشن تے بارڈر سکیورٹی دی صلاحیت تے استعدادِ کار اچ بہتری کیتے یورپی یونین اچ جلد از جلد پلان پیش کیتا ویسی۔ وزیراعظم وزیر داخلہ دی کوششاں کوں سراہیا۔ ملاقات اچ ملکی داخلی تے مجموعی صورتحال تے وی ڳالھ تھئی۔