وزیراعظم محمد شہباز شریف دی زیرِ صدارت وزارتِ قومی غذائی تحفظ و تحقیق دے امور تے اجلاس

اسلام آباد۔ 5 مارچ (اے پی پی) وزیراعظم محمد شہباز شریف آکھیے جو زراعت تے غذائی تحفظ دے شعبے ملکی معیشت اچ اہم ستون دا درجہ رکھیندن، ایگریکلچر روڈ میپ دے حوالے نال صوبائی حکومتاں، گلگت بلتستان تے آزاد جموں و کشمیر دی حکومتاں نال مشاورت دا عمل مزید موثر بݨایا ونڄے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت وزارتِ قومی غذائی تحفظ و تحقیق دے امور تے اجلاس تھیا۔ اجلاس اچ وفاقی وزیرِ اقتصادی امور احد خان چیمہ، وفاقی وزیرِ قومی غذائی تحفظ و تحقیق رانا تنویر حسین، وزیرِ مملکت خزانہ و ریلوے بلال اظہر کیانی، وزیراعظم دے معاونِ خصوصی ہارون اختر، چارے صوبیں، گلگت بلتستان، آزاد جموں و کشمیر دے چیف سیکرٹریز تے متعلقہ اعلیٰ سرکاری افسران شرکت کیتی۔وزیراعظم آکھیا جو زراعت تے غذائی تحفظ دے شعبے ملکی معیشت اچ اہم ستون دا درجہ رکھیندن۔ وزیراعظم ایگریکلچر روڈ میپ دے حوالے نال صوبائی حکومتاں، گلگت بلتستان تے آزاد جموں و کشمیر دی حکومتاں نال مشاورت دا عمل مزید موثر بݨاوݨ دی ہدایت کیتی۔ انھاں چین توں زرعی تحقیق دے حوالے نال تربیت حاصل کرݨ آلے سکالرز نال پاکستانی زرعی شعبے اچ ریفارمز دے حوالے نال مشاورت تے انھاں نال رابطہ رکھݨ دی ہدایت وی کیتی۔اجلاس کوں پرائم منسٹر سٹریٹجک روڈ میپ زراعت تے غذائی تحفظ تے بریفنگ ݙتی ڳئی۔ اجلاس کوں ݙسایا گیا جو ساری وفاقی اکائیاں اچ نیشنل فوڈ اینڈ ایگریکلچر سکیورٹی کونسل تشکیل ݙتی ویندی پئی اے۔ اجلاس کوں ݙسایا ڳیا جو پرائم منسٹر سٹریٹجک روڈ میپ دے 5 ستون ہن، ایں روڈ میپ دا مقصد مستحکم تے مسابقتی زرعی تے غذائی نظام دا حصول اے، ایں روڈ میپ دے تحت غذائی تحفظ دے اقدامات چاتے ویسن، نجی شعبے کوں زرعی برآمدات اچ ودھارے دے حوالے نال فعال کیتا جاسی، واٹر گورننس تے موسمیاتی تبدیلی دا مقابلہ کرݨ آلی فصلاں کوں ترجیحاً عام کیتا ویسی تے ایں حوالے نال تحقیق کوں مربوط کیتا ویسی۔پاکستان دے عوام دی غذائیت کوں بہتر بݨاوݨ دے اقدامات چاتے ویسن، روڈ میپ دے تحت ڈیش بورڈ تشکیل ݙتا ویندا پئے جیڑھا اجناس دی سٹوریج تے تحفظ تے میکانائزیشن کوں بہتر بݨاوݨ تے نگرانی دا کم کریسی۔ زرعی نظام دی ریگولیشن کوں ڈیجیٹائز کیتا ویندا پئے، کاشتکاراں کوں سرمائے تئیں رسائی ݙیوݨ دے حوالے نال فارم تے نان-فارم کریڈٹ دا نظام لایا ویندا پئے۔ فصلاں دی غذائی استعداد ودھاوݨ تے بائیو فورٹیفائیڈ فوڈ دے حوالے نال کم کیتا ویسی۔ ملک دے ݙاہ پسماندہ ضلعیں اچ زراعت دے ودھارے کیتے ٹارگٹڈ پیکیج ݙتے ویسن۔ ایگری گریجویٹس-یوٹیلائیزشن سکیم دا اجراء کیتا ویسی جیندے تحت زرعی تحقیق کوں ودھارا ملسی۔