وزیراعلیٰ مریم نواز بیوگان تے ماں پیو دی شفقت توں محروم ٻالاں کیتے رحمت کارڈ دی منظوری ݙے ݙتی

لاہور۔ 5 مارچ (اے پی پی) وزیراعلیٰ پنجاب مریم نواز شریف بیوگان تے ماں پیو دی شفقت توں محروم ٻالاں کیتے رحمت کارڈ دی منظوری ݙے ݙتی۔ وزیراعلیٰ مریم نواز شریف دی صدارت خصوصی اجلاس تھیا۔ اجلاس اچ پنجاب اچ بیوگان تے یتامیٰ کیتے پاکستان دی تاریخ دا پہلا وزیراعلیٰ پنجاب رحمت کارڈ متعارف کراوݨ دا فیصلہ کیتا ڳیا۔ صوبائی معاون خصوصی برائے عشر و زکوٰۃ راشد نصر اللہ وزیراعلیٰ پنجاب رحمت کارڈ پراجیکٹ تے تفصیلی بریفنگ ݙتی۔ اجلاس کوں بریفنگ اچ ݙسایا گیا جو وزیراعلیٰ پنجاب رحمت کارڈ دے ذریعے ہک لکھ تئیں مالی امداد ݙتی ویسی۔ پہلے فیز اچ 40 ہزار توں ودھ مستحقین خانداناں کوں رحمت کارڈ ݙتے ویسن۔ وزیراعلیٰ پنجاب رحمت کارڈ پراجیکٹ دا آغاز عید دے فوراً بعد تھیسی۔ بریفنگ اچ ٻیا ݙسایا ڳیا جو وزیراعلیٰ پنجاب رحمت کارڈ دے ذریعے بیوگان تے یتیم ٻالاں کوں 25، 25 ہزار ملسن۔ وزیراعلیٰ پنجاب رحمت کارڈ کیتے موبائل ایپلی کیشن، ویب پورٹل، کال تے سینٹر آف زکوٰۃ آفس توں رجوع کیتا ونج سڳدے۔ وزیراعلیٰ مریم نواز شریف آکھیا جو پنجاب دے وسائل تے ہر بندے دا پورا حق اے۔ حقدار تئیں حق پڄاوݨ کیتے سارے وسائل لیسوں۔ وزیراعلیٰ پنجاب رحمت کارڈ دے ذریعے بیوہ خواتین کوں خود روزگار دی راہ تے گامزن کرݨ چاہندن۔ وزیراعلیٰ مریم نواز شریف آکھیا جو پنجاب ایہوجیہا صوبہ اے جتھاں ہر بندے دا خیال رکھیا ویندے۔ وزیراعلیٰ پنجاب رحمت کارڈ دے ذریعے بیوہ خواتین تے ٻال مالی خود مختاری دے نال باوقار زندگی گزار سڳسن۔