پاکستان دا بھارت تے کینیڈا وچال طویل مدتی یورینیم سپلائی معاہدے تے ݙوہیں ملکاں وچال سمال ماڈیولر ری ایکٹرز اتے جدید ری ایکٹر ٹیکنالوجیز اچ ممکنہ تعاون تے تشویش دا اظہار

اسلام آباد۔ 5 مارچ (اے پی پی) پاکستان کینیڈا اتے بھارت وچال طویل المدتی یورینیم فراہمی دے معاہدے تے ݙوہیں ملکاں وچال چھوٹے جوہری ری ایکٹراں تے جدید جوہری ری ایکٹراں دی ٹیکنالوجی دے شعبیاں اچ ممکنہ تعاون تے تشویش دا اظہار کیتے۔ ترجمان دفترِ خارجہ طاہر حسین اندرابی خمیس کوں بھارت تے کینیڈا وچال یورینیم دی فراہمی دے معاہدے تے جوہری ری ایکٹراں دی جدید ٹیکنالوجی دے شعبے اچ ممکنہ تعاون دے حوالے نال ذرائع ابلاغ دے سوالاں دے جواب اچ آکھیا جو اے انتظام سول جوہری تعاون دے شعبے اچ ہک ٻئے ملک کیتے متعصبانہ استثنیٰ دی مثال اے۔ انھاں آکھیا جو اے امر خاص طور تے قابلِ توجہ اے جو بھارت دا 1974 دا جوہری تجربہ ہک ایہوجیہے ری ایکٹر توں حاصل کردہ پلوٹونیم دے استعمال نال کیتا ڳیا ہئی جیہڑا کینیڈا پرامن مقصد کیتے فراہم کیتا ہئی اتے اے براہِ راست جوہری فراہم کنندگان دے نیوکلیئر سپلائرز گروپ دے قیام دا سبب بݨیا ہئی۔ انھاں آکھیا جو ہک ایہوجہی ریاست جیندی کارروائیاں عالمی برآمدی ضوابط دے نظام دے قیام دا موجب بݨیاں، ہݨ منتخب انتظامات دے تحت ترجیحی رسائی حاصل کریندی پئی اے۔ ترجمان آکھیا جو بھارت نہ تاں آپݨی ساری سول جوہری تنصیبات کوں بین الاقوامی جوہری توانائی ایجنسی دے حفاظتی انتظامات دے تحت رکھیے اتے نہ ایں انتظام دے تحت ایویں کرݨ دا کوئی پابندِ عہد کیتے۔ انھاں آکھیا جو متعدد تنصیبات بدستور بین الاقوامی معائنے دے دائرۂ کار توں ٻاہر ہن، اے وی واضح کائنی جو ایں معاہدے دے نال جوہری عدم پھیلاؤ دے حوالے نال کوئی ٹھوس یقین دہانیاں منسلک ہن یا کائنا۔ ترجمان آکھیا جو پاکستان ایں امر دا اعادہ کریندے جو سول جوہری تعاون کوں غیر امتیازی تے معیاراں تے مبنی ایہوجیہے طریقے دے تحت تھیوݨا چاہیدے جیہڑا انھاں ساری ریاستاں تے ہکو جیہاں لاگو تھیوے جیہڑیاں جوہری عدم پھیلاؤ دے معاہدے دا فریق کائنی۔ انھاں آکھیا جو متعصبانہ استثنائی انتظامات عالمی عدم پھیلاؤ دے نظام دی ساکھ کوں مجروح کریندن اتے خطے اچ ٻئے عدم استحکام دا خطرہ پیدا کر سڳدن۔