پاکستان دے کول توانائی دے ذخائر تے رسد دے مناسب سطح تے انتظامات موجود ہن، وزیرِ خزانہ سینیٹر محمد اورنگزیب دی برطانوی ہائی کمشنر نال ملاقات اچ ڳالھ مہاڑ

اسلام آباد۔ 5 مارچ (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو پاکستان دے کول توانائی دے ذخائر تے رسد دے مناسب سطح تے انتظامات موجود ہن، وسائل دے دانشمندانہ استعمال کیتے صوبائی حکومتاں دے نال قریبی رابطہ رکھیا ویندا پئے، حکومت بین الاقوامی مالیاتی فنڈ دے نال پروگرام دے اہداف حاصل کرݨ تے ڈھانچہ جاتی اصلاحات کوں اڳوں ودھاوݨ کیتے پرعزم اے۔ انھاں اے ڳالھ خمیس کوں اتھاں پاکستان اچ برطانوی ہائی کمشنر جین میریٹ نال ملاقات اچ آکھی۔ ملاقات اچ خطے دی اڄوکی پیش رفت، پاکستان دی معاشی صورتحال، جاری اقتصادی اصلاحات تے ݙو پاسہ اقتصادی تعاون کوں ٻیا مضبوط بݨاوݨ دے امکانات تے ڳالھ کیتی ڳئی۔ وزیرِ خزانہ ہائی کمشنر کوں آگاہ کریندیں ہوئیں ݙسایا جو حکومت خطے اچ بدلدی ہوئی صورتحال دے ممکنہ معاشی اثرات نال نبڑݨ کیتے پیشگی اقدامات کریندی پئی اے، وزیرِ اعظم اہم وفاقی وزارتاں تے سٹیٹ بینک آف پاکستان تے مشتمل ہک اعلیٰ سطح دی کمیٹی قائم کیتی اے جیہڑی روزانہ دی بنیاد تے اہم شعبیاں دی صورتحال دا جائزہ گھندی پئی اے، خصوصاً توانائی دی فراہمی تے عالمی اجناس دی منڈیاں تے گہری نظر رکھی ویندی پئی اے۔ اے کمیٹی سپلائی چینز، قیمتاں اچ اتار چڑھاؤ تے پٹرولیم مصنوعات، خام تیل، کوئلہ تے گیس دی ممکنہ قلت یا رکاوٹاں دا جائزہ گھندی پئی اے جݙاں جو مہنگائی، ٻاہرلے کھاتیاں تے مالیاتی استحکام تے ممکنہ اثرات دا وی تجزیہ کیتا ویندا پئے۔ وزیرِ خزانہ آکھیا جو پاکستان دے کول ایں ویلھے توانائی دے ذخائر تے سپلائی دے مناسب سطح تے انتظامات موجود ہن، حکومت ممکنہ حالات کوں مدنظر رکھیندیں ہوئیں مختلف منظرنامیاں دی منصوبہ بندی تے حساسیت دے تجزیے وی کریندی پئی اے۔ ایندے نال نال توانائی دے موثر استعمال دے اقدامات تے وی غور کیتا ویندا پئے اتے صوبائی حکومتاں دے نال قریبی رابطہ رکھا ویندا پئے تانجو وسائل دا دانشمندانہ استعمال یقینی بݨایا ونج سڳے اتے منڈی اچ غیر ضروری خوف و ہراس پیدا نہ تھیوے۔برطانوی ہائی کمشنر حکومت دی اقتصادی اصلاحات دے عزم کوں سراہیا اتے پاکستان اچ معاشی استحکام تے طویل المدتی ترقی کیتے برطانیہ دی مسلسل حمایت دا اعادہ کیتا۔ انھاں آکھیا جو برطانیہ پاکستان دی ترقی تے معاشی تبدیلی دا ہک مضبوط شراکت دار اے اتے اصلاحاتی اقدامات، نجی شعبے دی شمولیت تے تکنیکی تعاون دے ذریعے تعاون جاری رکھیسی۔ انھاں خاص طور تے کان کنی تے معدنی وسائل دے شعبیاں اچ سرمایہ کاراں دے اعتماد کوں فروغ ݙیوݨ دی اہمیت تے وی زور ݙتا۔فریقین قدرتی وسائل نال مالا مال علاقیاں اچ استحکام، چنگی حکمرانی، پائیدار ترقی کوں یقینی بݨاوݨ، بین الاقوامی سرمایہ کاری کوں راغب کرݨ تے جامع معاشی ترقی کوں نہایت اہم قرار ݙیوݨ تے وی اتفاق کیتا۔