حکومت ایران تے ٻئے خلیجی ملکاں اچ پھتے پاکستانیاں دی سہولت تے معاونت کیتے جامع اقدامات کیتن، نائب وزیراعظم تے وزیر خارجہ اسحاق ڈار دی میڈیا کوں بریفنگ

اسلام آباد۔ 3 مارچ (اے پی پی) نائب وزیراعظم تے وزیر خارجہ سینیٹر محمد اسحاق ڈار آکھیے جو حکومت ایران تے ٻئے خلیجی ملکاں اچ پھتے پاکستانیاں دی سہولت تے معاونت کیتے جامع اقدامات کیتن، پاکستان مختلف مسلم ملکاں دے وزرائے خارجہ تے سفارتکاراں نال رابطہ کیتے، چاہندوں جو خلیجی ملک سفارتکاری آلے پاسے آون ۔ نائب وزیراعظم اے ڳالھ دفترِ خارجہ اچ مشرقِ وسطیٰ دی موجودہ صورتحال بالخصوص خلیجی ملکاں اچ پھتسے پاکستانیاں دے مسئلے تے میڈیا کوں بریفنگ ݙیندے آکھی۔انھاں آکھیا جو ایران پاکستان دا ہمسایہ ملک اے، جے صورتحال نازک تھیندی اے تاں ایندا اثر ساݙے تے وی آسی، چین وی چاہندے جو خطے اچ امن بحال تھیوے۔ سینیٹر محمد اسحاق ڈار آکھیا جو واپس آوݨ آلے پاکستانی شہریاں دی معاونت کیتے خصوصی سہولت ڈیسک قائم کیتے ڳئن، وزارتِ خارجہ دا کرائسز مینجمنٹ یونٹ چووی گھنٹے فعال اے تے ایندے رابطہ نمبرز سرکاری ایکس ہینڈل تے دستیاب ہن۔ انھاں آکھیا جو ایران دے شہراں تہران، زاہدان تے مشہد اچ ترائے سہولت مراکز بݨائے ڳئن تاں جو پاکستانیاں دی رہنمائی تے مدد کیتی ونڄ سڳے۔انھاں آکھیا جو پھتے پاکستانیاں دی ہرممکن معاونت کیتے پاکستان مختلف ملکاں دے وزرائے خارجہ تے اعلیٰ حکام نال رابطے اچ اے۔ نائب وزیراعظم آکھیا جو ابوظہبی اچ پاکستان دا سفارت خانہ تے جدہ و دبئی اچ قونصل خانے پاکستانی شہریاں دی فعال معاونت کریندے پئن۔ نائب وزیراعظم تے وزیر خارجہ بحرین، عمان، کویت، سعودی عرب، قطر، ایران تے آذربائیجان دا پاکستانی برادری دے نال تعاون تے مدد تے شکریہ ادا کیتا۔انھاں آکھیا جو ہݨ تئیں 792 پاکستانی ایران توں واپس آچکئن جݙاں جو تقریباً 33 ہزار پاکستانی ایں ویلھے اتھاں رہندے پئن ۔سینیٹر محمد اسحاق ڈار آکھیا جو پاکستان سودھے کئی ملکاں دے شہری ایران تے کجھ خلیجی ریاستاں اچ پھتے ہوئن کیوں جو عمان تے سعودی عرب دے علاوہ فضائی حدود بند ہن تاں جو زمینی رستے کھئن جیڑھے اگرچہ وقت طلب ہن لیکن کئی ملک انھاں دے ذریعے انخلاء کریندے پئن۔ انھاں آکھیا جوعراق دی فضائی حدود وی بند اے ایں کیتے عراق اچ موجود پاکستانی زائرین دی وی معاونت کیتی ویندی پئی اے۔نائب وزیراعظم آکھیا جو ابوظہبی اچ میزائل ڈھݨ نال ہک پاکستانی شہری شہید تھئے۔ سینیٹر محمد اسحاق ڈار آکھیا جو ایران تے خلیجی ملکاں اچ صورتحال ابتر اے، پاکستان چاہندوں جو خلیجی ملک سفارتکاری آلے پاسے آون ، ایران تے خلیجی ملک دے فضائی روٹس بند ہن، پاکستان سودھے کئی ملکاں دے لوک ایران تے خلیجی ملکاں اچ پھتے ہوئن۔ سینیٹر محمد اسحاق ڈار آکھیا جو خلیجی ملک اچ تقریباً 45 لکھ پاکستانی موجود ہن۔ انھاں آکھیا جو مختلف ملک زمینی رستیں کوں استعمال کریندے پئن، ابوظہبی اچ سفارت خانہ تے جدہ تے دبئی اچ قونصل خانے فعال ہن، ایران اچ 3 سینٹرز تہران، زاہدان تے مشہد اچ فعال ہن، خصوصی سہولت ڈیسک دا مقصد پاکستانیاں دی مدد اے، 300 دے نیڑے ایرانی وی پاکستان آئن۔ انھاں آکھیا جو باکو توں پروازاں آپریشنل ہن، ایران توں 64 پاکستانی آذربائیجان پڄن، پاکستانیاں دے انخلاء اچ معاونت تے آذربائیجان حکومت دا شکریہ ادا کریندوں۔ انھاں آکھیا جو پاکستان داخلے تے آپݨے شہریاں دی معاونت کوں یقینی بݨایا ویندا پئے۔