خطے دی موجودہ صورتحال تشویشناک، مسلم ملکاں کوں اتحاد دا مظاہرہ کرݨا پوسی، پاکستان آپݨی خودمختاری تے سالمیت تے کوئی سمجھوتہ نہ کریسی، ارکان قومی اسمبلی

اسلام آباد۔ 3 مارچ (اے پی پی) قومی اسمبلی اچ حکومت تے اپوزیشن ارکان خطے دی موجودہ صورتحال تے تشویش کریندے آکھیے جو مسلم ملکاں کوں آپت اچ اتحاد دا مظاہرہ کرݨا پوسی، پاکستان امن چاہندے تاں جو آپݨی خودمختاری تے سالمیت تے کوئی سمجھوتہ نہ کریسی۔ قومی اسمبلی اچ وفاقی وزیر ڈاکٹر طارق فضل چوہدری آکھیا جو ایجنڈے تے مشتمل کجھ ٻل دے علاوہ معمول دا ایجنڈا معطل کرتے خطے دی موجودہ صورتحال تے بحث کرائی ونڄے۔ انھاں تحریک پیش کیتی جیندی ایوان منظوری ݙتی۔بعد اچ بحث دا آغاز کریندے اپوزیشن رکن انیقہ مہدی آکھیا جو سچ کیتے ڈٹ ونڄݨ ہی دین دا درس اے، خودداری قیمت منڳدی اے، آیت اللہ خامنہ ای جان ݙے ݙتی لیکن باطل دے سامݨے جھکݨ توں انکار کرݙتا۔ پیپلز پارٹی دے رکن عبدالقادر پٹیل آکھیا جو اساں آپݨی بہادر افواج دی روزانہ تصویراں تے شہادتاں دی پے در پے خبراں ݙیکھدوں تاں دل پھٹݨ کوں آندے، اللہ کریم پاک فوج تے ساݙے محافظین کوں منافقاں توں بچاوے تے غیراں دی سازشاں توں وطنِ عزیز کوں محفوظ بݨاوے تے ایں عفریت دا مقابلہ کرݨ دی توفیق ݙیوے، امتِ مسلمہ دے ساریں توں عظیم لیڈر آیت اللہ خامنہ ای 86 سال دی عمر اچ شہادت دا جام نوش کیتا، امتِ مسلمہ کوں متحد تھیوݨا پوسی، امتِ مسلمہ تے برپا ظلم تے چپ نی رہݨا چاہیدا۔ انھاں آکھیا جو سفارتی محاذ تے ایں قتلِ عام کوں روکیے ونڄݨ کیتے آواز چاوݨی چاہیدی اے، اساکوں ٹھوس اقدامات چاوݨے پوسن۔ انھاں آکھیا جو ہک عظیم مسلمان دی شہادت تے امتِ مسلمہ چپ اے جیڑھی ݙکھ دی ڳالھ اے، بے حسی دی کوئی معافی کائنی، اساں ساریں توں پہلے پاکستان دا اعادہ کریندوں ۔ انھاں آکھیا جو جنھاں کوں اساں پناہ ݙتی اوہے نمک حرام نکلئے۔اپوزیشن رکن گوہر علی خان وی خطے دی صورتحال تے تشویش کریندے ایران تے حملے دی مذمت کیتی تے آیت اللہ خامنہ ای دی شہادت تے اظہارِ افسوس کیتا۔ ایم کیو ایم دی رکن آسیہ اسحاق آکھیا جو پاکستان کنے جیڑھا میلی اکھ نال ݙیکھسی او اکھ کڈھ گھنسوں، افغان طالبان کوں پاکستان بھن جواب ݙیندا پئے، طالبان ایجھے ویلھے اچ جݙاں امریکہ تے اسرائیل ایران تے حملہ کیتے تاں او اسرائیل تے بھارت توں مدد منڳدے پئن، پاکستان دی جوہری قوت اونکوں دشمناں توں بچا تے رکھیے، پاکستان افغانستان، بھارت تے اسرائیل کوں اے واضح پیغام ݙیندا پئے جو ساݙی طرف میلی اکھ نال نہ ݙیکھے، اساں او اکھ کڈھ گھنسوں۔ سحر کامران آکھیا جو او آیت اللہ خامنہ ای دی شہادت تے تعزیت دا اظہار کریندی اے، او اسلام دے علمبردار ہن، انھاں اسلام دی سربلندی کیتے آپݨی زندگی وقف کیتی۔ انھاں آکھیا جو صیہونی سازش خطے دا امن تباہ و برباد کرݙتے، اسرائیل پوری امتِ مسلمہ کوں شدتِ جنگ نال ݙوچار کر ݙتے۔ انھاں آکھیا جو خلیجی ملکاں اچ وی جنگ جاری اے، اتھاں وݙی تعداد اچ پاکستانی تارکینِ وطن موجود ہن، صدرِ مملکت آصف علی زرداری انھاں حالات اچ بہتر سفارتکاری کر سڳدن، پاکستان امن چاہندے، اساں ہمیشہ خطے اچ امن دی ڳالھ کیتی اے، مسلمان متحد نہ تھئے تاں آپݨی واری دا انتظار کرن۔