سمندر پار مقیم پاکستانیاں دی ترسیلاتِ زر دے محصولات اچ ایں مالی سال دے دوران 11 فیصد ودھارا تھیا، سٹیٹ بینک

اسلام آباد۔ 3 مارچ (اے پی پی) سمندر پار رہݨ آلے پاکستانیاں ولوں ترسیلاتِ زر دے محصولات اچ ایں مالی سال دے دوران 11 فیصد ودھارا تھیے، جولائی 2025 توں جنوری 2026 اچ 7 مہینے دے عرصے اچ ترسیلاتِ زر دی وصولیاں 23.2 ارب ڈالر تئیں ودھ ڳئن۔ سٹیٹ بینک دے تخمینے دے مطابق جاری مالی سال اچ ترسیلاتِ زر دے محصولات دا مجموعی حجم 41.2 ارب ڈالر تئیں ودھݨ دی توقع اے۔ اعداد و شمار دے مطابق ایں مالی سال دے ابتدائی ست مہینے اچ جولائی 2025 توں جنوری 2026 دے دوران خلیجی ملکاں توں بھیجی ڳئی ترسیلاتِ زر دا حجم 10.88 ارب ڈالر رہیے۔ ایں طرح دورانِ مالی سال اچ سمندر پار مقیم پاکستانیاں توں بھیجی ونڄݨ آلی مجموعی رقوم اچ خلیجی ممالک دا حصہ 46.9 فیصد رہیے۔ ایں دوران سعودی عرب توں ترسیلاتِ زر دی وصولی 3.89 ارب ڈالر یعنی 16.8 فیصد جݙاں جو متحدہ عرب امارات توں 4.78 ارب ڈالر یعنی 20.6 فیصد ترسیلاتِ زر محصولات تھئن۔ ایں طرح خلیجی ملکاں توں بھیجی ڳئی رقوم اچ عمان، قطر، کویت تے بحرین دا حصہ 9.5 فیصد رہیے اتے انھاں ملکاں توں مجموعی طور تے 2.2 ارب ڈالر دی ترسیلاتِ زر موصول تھین۔ انسٹی ٹیوٹ آف کاسٹ اینڈ مینجمنٹ اکاؤنٹنٹس آف پاکستان (آئی سی ایم اے پی) دے شعبہ ریسرچ اینڈ پبلیکیشن دے سینئر ڈائریکٹر شاہد انور ایں خدشے دا اظہار کیتے جو ایران، امریکا تنازعے پاروں پیدا تھیوݨ آلی خلیجی ملکاں دی اڄوکی صورتحال دی وجہ توں خلیجی ممالک اچ مقیم پاکستانی کارکنوں ولوں بھیجی ونڄݨ آلی رقوم اچ 10 توں 15 فیصد دی ڳئھٹکی تھی سڳدی اے۔