پاکستان ایران دے نال کھڑے، مذاکرات دے ذریعے حل دی کوششاں جاری ہن، نائب وزیراعظم اسحاق ڈار

اسلام آباد۔ 3 مارچ (اے پی پی) نائب وزیراعظم اتے وزیر خارجہ سینیٹر محمد اسحاق ڈار آکھیا جو پاکستان دل و جان نال ایران دے نال کھڑے، ملک دے اندر ایں معاملے کوں غلط رنگ ݙیوݨ مناسب کائنی، فریقین کوں مذاکرات دی میز تے ڳھن آوݨ کیتے پاکستان مسلسل کوششاں کریندا پئے۔ منگل کوں سینیٹ اجلاس اچ ڳالھ مہاڑ کریندیں ہوئیں انھاں آکھیا جو 28 فروری کوں پاکستان ایران تے حملے دی صورتحال تے پہلا باضابطہ ردعمل ݙتا جݙاں جو آیت اللہ علی خامنہ ای دی شہادت تے وزیراعظم شہباز شریف یکم مارچ کوں تعزیتی بیان جاری کیتا۔ وزیر خارجہ آکھیا جو پاکستان نے ہر فورم تے اے موقف اپنایا جو مسئلہ بین الاقوامی قوانین تے مذاکرات دے ذریعے حل تھیوݨا چاہیدے۔ اسحاق ڈار ٻیا آکھیا جو گزریل ترائے ݙینہ اچ کئی ملکاں نال رابطے کیتے ڳئے اتے عمان دے وزیر خارجہ نال وی ڳالھ تھئی، جیندے اچ امید ظاہر کیتی ڳئی جو مذاکرات دے ذریعے مسئلہ حل تھی سڳدے۔ انھاں یاد ݙوایا جو جون اچ وی ایران تے حملہ تھیا ہئی اتے اوں ویلھے وی پاکستان ترکیہ، سعودی عرب، متحدہ عرب امارات، قطر تے یورپی یونین سودھے کئی ملکاں نال رابطے کیتے تانجو معاملہ سلجھایا ونج سڳے۔ انھاں زور ݙتا جو ایران پاکستان دا برادر اسلامی تے ہمسایہ ملک اے اتے پاکستان آپݨی ذمہ واری پوری کریندا رہیے اتے کریندا رہسی۔ وزیر خارجہ آکھیا جو ایران خود واضح کر ݙتے جو او جوہری ہتھیار کائنا بݨیسی اتے سارے مسائل دا حل ڳالھ مہاڑ تے سفارتی ذرائع نال کڈھیا ویسے۔ پاکستان دی ثالثی دی پیشکش تے ایران دا ردعمل مثبت رہیا۔ اسحاق ڈار آکھیا جو امریکہ تے اسرائیل ولوں ایران تے حملے تے ایران ولوں جواب اچ خلیجی ملکاں تے حملیاں دے بعد پیدا تھیوݨ آلی صورتحال تے پاکستان واضح پالیسی اختیار کیتی۔ پاکستان جوہری توانائی دے پرامن استعمال دے حق اچ ایران دی حمایت کیتی اتے دنیا اچ واحد ملک ہووݨ دا اعزاز حاصل کیتا جئیں ایران تے حملے دی کھلے عام مذمت کیتی۔ انھاں آکھیا جو 12 سال بعد اقوامِ متحدہ دی سلامتی کونسل اچ اتفاقِ رائے نال قرارداد پاس تھئی، جیندے اچ ایران توں پابندیاں ہٹاوݨ دا آکھیا ڳیا۔ پاکستان 28 فروری کوں سکیورٹی کونسل دا ہنگامی اجلاس سݙیا اتے ایران تے حملے دی مذمت کیتی۔ انھاں واضح کیتا جو حکومت خطے اچ استحکام برقرار رکھݨ تے تنازعات کوں سفارتی ذرائع نال حل کرݨ دی کوششاں اچ پوری طرح مصروف اے۔